星期六上完 body combat 班，又攰又肚餓。諗住去之前去過一間幾好食嘅西班牙餐廳，點知原來無開。行過隔離街見到間成間綠色好有文青風嘅 cafe，就諗住入去試下。一入到去見到差唔多坐滿人，成大幅綠色嘅牆係手繪嘅社區街道圖，幾有心思。食客都同職員好好傾，成個氣氛好舒服。 職員問我哋有無訂枱，我心諗：下去 cafe 都要訂枱？同埋周圍餐廳都無咩人，係呢間特別多人嘅？好彩收銀隔離仲有張枱，坐低之後就叫咗個印度奶茶同一個 Lamb and egg。手打羊肉好鮮嫩，同流心蛋好夾，仲有自家制嘅醬汁同薯仔餅底，好有驚喜。食完之後好慶幸之後有多過地方 brunch。（註：有關食物描述由女友提供，叫我做 Foodie 介紹好西真係無咩可能…) 點知過咗兩日就喺新聞見到，原來啱啱週末就係佢地最後嘅營業日。之前都有好多餐廳頂唔順 cost of living crisis 執咗，但係一間咁高質素，咁多人食嘅 cafe 都要執，真係估唔到。知道咗呢單新聞之後，個腦即刻浮現咗之前睇過嘅一句話：所有嘅嘢都係借番嚟。

人愈大愈覺得時間嘅流動好奇妙。有啲嘢明明發生咗好多年，但係仲係記得好清楚。另外一啲嘢只係兩三年前，已經覺得好遙遠。唔知道《勿念》嗰句「我怕回憶稀薄」，係咪講緊呢個情況？ 去咗新嘅地方生活，語言、天氣、交通、工作，樣樣都要適應。成日都覺得好 overwhelmed，用咗好多時間先慢慢習慣。不過學習到喺新環境點樣自處，又好似打機過咗一關咁，幾有滿足感。新嘅環境，都會令人思考好多以前無諗過嘅問題，例如點解外國人咁鍾意講天氣，唔同種族嘅人應該點樣相處等等。 香港嘅生活同工作節奏都好急促，永遠都停唔到落嚟。呢幾個月終於有機會做一件我好想做嘅嘢，就係整理番以前散落係網上唔同地方嘅blog/ 日記，放番喺同一個地方（始終都係 plain text files最好）。搵搵下都有好多，有Xanga、Blogger、 Wordpress、 Evernote等等。睇番自己好多年前寫嘅嘢，陌生得嚟，又有啲親切，好似可以同番多年前嘅自己對話。唔知應唔應該慶幸嘅係，過咗咁多年，我對好多嘢嘅諗法都無太大改變，只係好多以前好著緊嘅事，原來都係不值一提。可能將來面對咩難關，都可以提醒番自己。睇番以前我啲posts 嘅留言，先諗番原來之前我呢幾個朋友分享咗咁多深入嘅諗法。不過大部分都好多年無聯絡了。

科技發展令好多嘢都更方便。以前寄信要好多日，宜家無論喺地球邊個角落，WhatsApp 即刻就收到（無死機嘅話）。交通網絡四通八達，去邊度都快咗好多。但係，多數人都無因為咁多咗時間。相反，要做嘅嘢總係做唔完，想睇嘅新聞同劇集睇極睇唔哂。科技到底係幫人慳咗時間，定係令人更加忙呢？ 喺好耐之前人類生活唔係咁樣。好似中古時代嘅農夫，日出而作、日入而息，無咁多聚會同娛樂，應該唔會因為時間管理搞到好大壓力。宜家時代進步咗，人類多咗時間，無論係因為自己意願、定係比社會影響，好似一定要做多啲嘢，如果唔係就浪費哂啲時間，無得 get in front, not behind。聽好青年荼毒室 YouTube，先知道有哲學家都有講呢個現象，叫佢做加速時代。 喺呢個加速時代，幾時都有值得關注嘅嘢發生緊。無論係搭車、排隊，食飯等上菜甚至係食到一半，只要有部手機，就總係想碌下 Facebook, Instagram 同 Twitter，睇下最新資訊。咩都唔做嘅話，就好似好焦慮，浪費緊時間咁。

當生活無咩變化嘅時候無嘢好寫，但生活突然大變，又會 overwhelmed 到唔知點寫好。 過去呢兩年，身體同精神都好攰，工作上好多嘢已經唔識點去處理，好似花咗好多心機，但係又無咩成果咁。一時覺得「我仲捱到多一陣」，一時又覺得「我都係唔可以捱落去喇」。我諗轉變下環境都係件好事。 去新嘅地方過生活，好似將之前累積嘅經驗、知識、人脈一鋪清枱，有啲可惜。但係鋼之鍊金術師話齋，人唔作出犧牲，就唔會得到任何回報。同埋總係要相信，咁多年黎學識嘅嘢，去到另一個地方都會用得著。就算有好多新嘢學，都係件好事丫。 我成日覺得留唔留喺香港嘅爭論好無謂。每個人嘅自身、家庭、財政考慮都唔同，自然有唔同嘅決定。再加上人生無得再嚟過，呢啲決定永遠唔會証實到係「啱」定係「錯」。喺香港又好，外地又好，重要嘅都係你係一個點樣嘅人。心安就好。 如果要過新嘅生活，趁自己仲未係咁老去學可能好啲。嚟咗蘇格蘭幾個星期，去咗城市入面好多地方，仲去咗倫敦兩日，見咗好多老朋友同新朋友，香港人同蘇格蘭人都有。見到已經喺香港嚟一段時間嘅朋友神采飛揚，好似幾享受人生咁。鄧佢地開心之餘，都覺得我要加把勁了。

估唔到將區塊鏈發揚光大嘅唔係比特幣或者去中心金融，而是一堆 JPEG 圖。呢幾個月好多人講點樣低買高賣 NFT 賺一筆。我一向唔鍾意炒賣，但就對NFT呢個技術好有興趣。 NFT 全名係 non-fungible token，即係「非同質化代幣」，但呢個只係學名。正如我哋平時唔會叫「人」做 homo sapiens，NFT 遲啲應該都會換個名，好似外國開始叫佢做 digital goods 咁。 「非同質化」，就係獨一無二。每個比特幣無分別，但是 NFT 就可以每個唔同，作表唔同嘅圖片、影片，或者會員証。宜家最紅嘅 NFT project 叫 Bored Ape Yacht Club，就係一萬張有不同特徵同裝飾嘅猿猴相。 有很多人講，NFT 只係 JPEG 圖，right click save 就得，值錢嘅地方喺邊呢？呢個就同區塊鏈有關。NFT 通過智能合約喺區塊鏈鑄造，會列明擁有者的身份，亦都可以轉讓。配合區塊鏈唔可以修改嘅特性，就成為咗擁有的証明。即係話買咗一個NFT，就等如擁有咗這件「電子藝術品」嘅真跡喇。

我比較少聽歌，如果唔係見到好多人講《某種老朋友》呢首歌都唔會留意到。聽咗幾次之後，愈聽愈有味道，喺個腦個度係咁loop，仲成日諗啲歌詞。 一首好歌，真係要作曲、填詞、歌手三個都夾先得。澤日生同林夕唔使講，兩個都係神級。網上有人話林家謙唱得唔夠好，如果係呀邊個邊個唱會好啲。我就覺得林家謙都唱得幾好啊。都係佢個把獨特嘅聲線，不過今次唔係自己作曲作詞，同之前嘅風格唔同，幾新鮮。唔係話一個歌手技巧高超就適合演繹一首歌。如果大家聽到佢把聲完全投入唔到，咁仲浪費首歌啦。 好多人分析呢首歌點樣同夕爺其他歌串連，又話首歌係講同楊千樺嘅關係，都幾有趣。不過呢個都係其中一個解法啫，我認為歌詞仲有其他解法。某種老朋友，除咗可以解做以前嘅朋友，都可以解做以前嘅自己，或者係一啲已經封塵嘅回憶，正所謂「你的朋友就是你」嘛。 能暫時懷念某種老朋友 不過未能共享一葉舟 彼此都處身洪流 如何掙扎沉浮 連回想起當初手牽手也顫抖

近排好多令人心情沉重嘅新聞，有時都想搵啲小遊戲玩下放鬆下。前幾日喺Facebook 見到有朋友 post 啲類似咁嘅 status： Wordle 215 4/6 ⬜🟩⬜⬜⬜ 🟨🟨⬜⬜⬜ ⬜🟩🟨🟨⬜ 🟩🟩🟩🟩🟩 有啲好奇所以就上網搵咗黎玩下。原來係一個叫做Wordle 嘅字謎遊戲，由一個英國人發明出黎，同佢鍾意玩字謎嘅伴侶玩，之後意外爆紅咗。 遊戲玩法簡單，每日有個五個字母嘅英文生字，比六次機會我地估，估完一次之後會有提示你邊個英文字母係（1）字母又啱位置又啱（綠色格）或者係（2）字母啱但係位置唔啱（黃色格）。雖然可以廿六個字母任揀，但係每次估嘅字都要係字典有嘅字，唔可以就咁估ABCDE。 有啲人提議第一次試就試 ADIEU（我英文差，完全唔知有個咁嘅字），試哂啲響音。我就比較鍾意試 COINS 同 TRADE 先，包咗大部分嘅響音同埋常用字，去到第三次先認真諗下試咩字。

加密貨幣從零到一，再到無限 — 在近幾個月，加密貨幣成了城中熱話。可惜大部人有興趣的只是低買高賣賺一筆，而不是背後的技術，或者加密貨幣可以怎樣改變世界。 加密貨幣的老祖宗，一定是比特幣(Bitcoin)。它的特式是以去中心化，或曰以「無大台」的方式紀錄交易，配合密碼學，令互不相識的人可以超越地域界限傳送「金錢」。除了比特幣外，全球第二大加密貨幣叫以太幣(Ether)。有不少人甚至相信在將來，以太幣會取代比特幣，成為最大的加密貨幣。 比特幣的出現，令人重新思考何謂金錢。以太幣背後的以太坊(Ethereum)願景更大，令人重新思考互聯網、金融體系、藝術、電腦遊戲等領域的未來。如果以太坊的願景成真，整個世界將有翻天覆地的改變。 以太坊是個智能合約平台，就像自動販賣機般，如果進行某個動作（如投幣並選擇飲品），就會有相應的結果（飲品在出口出現）。以太坊背後的程式語言理論上容許無限可能性。只要程式設計師想到，都可以用智能合約的方法做到。如果比特幣的出現在加密貨幣上是由零進化到一，那麼，以太坊的願景就是由一推進到無限，成為如英文書名所述的 “infinite machine”。可是，看完這本書後，我才發現這個由一到無限的進程，一點也不簡單。

人嘅大腦有時都幾奇妙。明明只係一個好耐之前聽過嘅故事，唔知點解呢排又會成日諗番起。 買櫝還珠嘅故事我應該係細個係學校學過。（唔知宜家中小學仲有無教？）講一個人去另一個國家賣珍珠，用好靚嘅木整咗一個裝珍珠嘅盒，薰到好香，仲有好多裝飾。結果買家買咗之後好鐘意個盒，還番粒珍珠俾佢。寓意係有啲人唔識貨，為咗啲無咩價值嘅嘢，放棄咗啲珍貴嘅嘢。 以前聽呢個故事已經喺度諗，個買家係鐘意個盒，唔鐘意珍珠。佢要個盒唔要珍珠，問題喺邊度呢？唔知點解，呢幾個月又成日諗起呢個故事。諗諗下發現，原來生活入面嘅好多問題，都係源於分唔清楚咩係「珍珠」，咩係「木盒」。 呢排聽唔同嘅朋友都話，宜家唔少大學生，讀書完全以考試為主導。考試唔考嘅嘢，對日常生活或者將來工作有幾有用都好，都唔想知唔想理。 我離開咗大學太耐，已經唔係好記得以前係點。應該主要都係為咗考試，不過課外知識有趣嘅話都有研究下掛。我記得大學嗰時好多人走堂，到咗考試前講貼士先會上堂。有次去到個學期十幾堂嘅尾二嗰堂，講考試重點。見到個滿哂嘅講堂，人數比平時多三四倍，我先知有咁多人讀呢科。教授一開口，就話 “In case we haven’t met before, I am professor XX, the professor of this course” ，現場即刻爆笑。