我比較少聽歌，如果唔係見到好多人講《某種老朋友》呢首歌都唔會留意到。聽咗幾次之後，愈聽愈有味道，喺個腦個度係咁loop，仲成日諗啲歌詞。

一首好歌，真係要作曲、填詞、歌手三個都夾先得。澤日生同林夕唔使講，兩個都係神級。網上有人話林家謙唱得唔夠好，如果係呀邊個邊個唱會好啲。我就覺得林家謙都唱得幾好啊。都係佢個把獨特嘅聲線，不過今次唔係自己作曲作詞，同之前嘅風格唔同，幾新鮮。唔係話一個歌手技巧高超就適合演繹一首歌。如果大家聽到佢把聲完全投入唔到，咁仲浪費首歌啦。

好多人分析呢首歌點樣同夕爺其他歌串連，又話首歌係講同楊千樺嘅關係，都幾有趣。不過呢個都係其中一個解法啫，我認為歌詞仲有其他解法。某種老朋友，除咗可以解做以前嘅朋友，都可以解做以前嘅自己，或者係一啲已經封塵嘅回憶，正所謂「你的朋友就是你」嘛。

能暫時懷念某種老朋友
不過未能共享一葉舟
彼此都處身洪流 如何掙扎沉浮
連回想起當初手牽手也顫抖

同曾經親密嘅朋友無論喺關係，定係價值觀都愈行愈遠。雖然好可惜，但多數人都應該會接受。但係當有時諗起以前嘅自己，同宜家嘅自己明明係同一個人，但係感覺竟然好陌生，更加令人唏噓。

不過同時又明白到人生每個階段都有唔同嘅問題，唔會話邊個時期係特別容易。喺時間洪流入面，無論係自己定係身邊嘅人，某程度上都係身不由己。去到最後，都只可以接受。

誰又能迴避某種過期朋友
一片葉無奈剛飄落背後
世上沒人能阻擋細水愛長流
若回憶偶爾活現就前來挑逗

呢幾句喺我個腦度成日 loop。一開始唔明，細水長流明明係好，點解變咗衰嘢？後來先明白係特登用咁嘅手法去對比，將原本美好嘅情境，喺歌詞入面變成水要流走離開樹葉，都幾諷刺。

「挑逗」用得好好。回憶收埋佢，唔好理就好似無事。但好似啲舊物咁，某一日拎番出黎，就會勾起好多思緒。雖然有吸引嘅地方，但係無論往事係開心定唔開心，回想番總令人有啲無可奈何。

《某種老朋友》呢首歌，與其話寫俾老朋友，不如話係自我提醒以前嘅嘢無論係好定唔好，都無辦法改變。就算舊朋友做咗一啲好過份嘅事，都要接受佢地都係「身不由己」。回憶呢啲嘢，偶然諗下就好。就算喺唔同嘅船上面，大家都要繼續前行。

近排好多令人心情沉重嘅新聞，有時都想搵啲小遊戲玩下放鬆下。前幾日喺Facebook 見到有朋友 post 啲類似咁嘅 status：

Wordle 215 4/6

⬜🟩⬜⬜⬜
🟨🟨⬜⬜⬜
⬜🟩🟨🟨⬜
🟩🟩🟩🟩🟩

有啲好奇所以就上網搵咗黎玩下。原來係一個叫做Wordle 嘅字謎遊戲，由一個英國人發明出黎，同佢鍾意玩字謎嘅伴侶玩，之後意外爆紅咗。

遊戲玩法簡單，每日有個五個字母嘅英文生字，比六次機會我地估，估完一次之後會有提示你邊個英文字母係（1）字母又啱位置又啱（綠色格）或者係（2）字母啱但係位置唔啱（黃色格）。雖然可以廿六個字母任揀，但係每次估嘅字都要係字典有嘅字，唔可以就咁估ABCDE。

有啲人提議第一次試就試 ADIEU（我英文差，完全唔知有個咁嘅字），試哂啲響音。我就比較鍾意試 COINS 同 TRADE 先，包咗大部分嘅響音同埋常用字，去到第三次先認真諗下試咩字。

呢個遊戲令我諗番起細個我都幾鐘意玩嘅 Mastermind（睇下圖可能會記得），要估由唔同顏色組成嘅四位密碼，估完一次之後就有白色同紅色標記提示顏色同位置有幾多粒正確。不過轉咗做文字版，多咗一定要係一個英文字嘅限制，感覺又好唔同。

在近幾個月，加密貨幣成了城中熱話。可惜大部人有興趣的只是低買高賣賺一筆，而不是背後的技術，或者加密貨幣可以怎樣改變世界。

加密貨幣的老祖宗，一定是比特幣(Bitcoin)。它的特式是以去中心化，或曰以「無大台」的方式紀錄交易，配合密碼學，令互不相識的人可以超越地域界限傳送「金錢」。除了比特幣外，全球第二大加密貨幣叫以太幣(Ether)。有不少人甚至相信在將來，以太幣會取代比特幣，成為最大的加密貨幣。

比特幣的出現，令人重新思考何謂金錢。以太幣背後的以太坊(Ethereum)願景更大，令人重新思考互聯網、金融體系、藝術、電腦遊戲等領域的未來。如果以太坊的願景成真，整個世界將有翻天覆地的改變。

以太坊是個智能合約平台，就像自動販賣機般，如果進行某個動作（如投幣並選擇飲品），就會有相應的結果（飲品在出口出現）。以太坊背後的程式語言理論上容許無限可能性。只要程式設計師想到，都可以用智能合約的方法做到。如果比特幣的出現在加密貨幣上是由零進化到一，那麼，以太坊的願景就是由一推進到無限，成為如英文書名所述的 “infinite machine”。可是，看完這本書後，我才發現這個由一到無限的進程，一點也不簡單。

加密貨幣圈子有句玩笑，叫「幣圈一天，人間一年」。我一直對這句話不以為然，覺得太誇張。不過，看了這本書後，才發現在短短數年間（本書主要談到以太坊在2013至2018年的發展），發生了的事真的有如一間大公司幾十年的歷史。老實說，整本書的描述有一點混亂，好像把很多不同事件大約依時序，沒太多整理隨便放在一起。可能，去中心化的發展，就是難以有條理地解釋吧。

有別於比特幣創辦人的神秘身分，以太坊的創辦人Vitalik Buterin一直積極參與加密貨幣社群的建設和討論，還被冠以「V神」的尊稱。Vitalik 從小就對比特幣著迷，參與了不少加密貨幣相關項目。可是他見到始終沒有人建立他理想中的智能合約平台，便決定自己著手去做。現在已經「封神」的Vitalik非常年輕，只是27歲。2015年，以太坊經歷了不少風波後正式上線，當時他21歲。

現在的以太坊非常成功。事實上，以太坊現在面對的問題是交易量太大，以致交易費用高得嚇人。不過，現在看起來的理所當然，是經歷了很多挑戰，包括創辦人意見不合、資金和監管問題，得來不易的成果。書中所述的挑戰，很多都可以令以太坊一蹶不振。但以太坊就是有能耐，跨越不同的難關。

以太坊上線只是幾年，但是改變可不少。當初的八個創辦人，除了V神外，另外七個均已經離開。有的幫忙建立以太坊的應用程式，如加密貨幣錢包，也有的建立希望成為「以太坊殺手」的加密貨幣。見到創辦人和主要建設者一個個離去，不無唏噓。但同時，這也顯示出以太坊不是某幾個人的項目，超越了個人層面。就連V神也不希望成為領導人，寧願成為團隊其中一人。這種發展方法是大勢所趨還是過度理想化，他日自有分曉。

看完本書，我見到在加密貨幣的狂熱中，有不少人只求金錢，無視它對社會帶來的可能性。但也有很多有心人，努力建設，希望解決社會的不同問題，令打破大型科企的壟斷，令金融體制更有效率，令藝術家得到應有的報酬等等。不過，解決問題的同時，也會帶來很多新的問題。不論各國政府還是開發者，好像都還在摸索加密貨幣在未來應有的位置。

以太坊現在已經很大，但要成為 infinite machine 的話，要走的路還有很長。期待可以快點看到之後的故事。

《以太奇襲：一位19歲天才，一場數位與金融革命》
The Infinite Machine: How an Army of Crypto-hackers Is Building the Next Internet with Ethereum

註：本文章並不構成任何投資建議。

人嘅大腦有時都幾奇妙。明明只係一個好耐之前聽過嘅故事，唔知點解呢排又會成日諗番起。

買櫝還珠嘅故事我應該係細個係學校學過。（唔知宜家中小學仲有無教？）講一個人去另一個國家賣珍珠，用好靚嘅木整咗一個裝珍珠嘅盒，薰到好香，仲有好多裝飾。結果買家買咗之後好鐘意個盒，還番粒珍珠俾佢。寓意係有啲人唔識貨，為咗啲無咩價值嘅嘢，放棄咗啲珍貴嘅嘢。

以前聽呢個故事已經喺度諗，個買家係鐘意個盒，唔鐘意珍珠。佢要個盒唔要珍珠，問題喺邊度呢？唔知點解，呢幾個月又成日諗起呢個故事。諗諗下發現，原來生活入面嘅好多問題，都係源於分唔清楚咩係「珍珠」，咩係「木盒」。

呢排聽唔同嘅朋友都話，宜家唔少大學生，讀書完全以考試為主導。考試唔考嘅嘢，對日常生活或者將來工作有幾有用都好，都唔想知唔想理。

我離開咗大學太耐，已經唔係好記得以前係點。應該主要都係為咗考試，不過課外知識有趣嘅話都有研究下掛。我記得大學嗰時好多人走堂，到咗考試前講貼士先會上堂。有次去到個學期十幾堂嘅尾二嗰堂，講考試重點。見到個滿哂嘅講堂，人數比平時多三四倍，我先知有咁多人讀呢科。教授一開口，就話 “In case we haven’t met before, I am professor XX, the professor of this course” ，現場即刻爆笑。

咁喺大學生活入面，咩係珍珠咩係木盒呢？有人會覺得大學最緊要攞個好成績，執靚CV，搵份好工。其他人就享受舍堂生活、上莊、識朋友、拍拖或者兼職，趁番工之前玩盡佢。又有啲人全心全意研究學問，成日問教授問題，包括好多考試唔會考嘅嘢。咁到底咩先係真正珍貴嘅經歷呢？可能都係因人而異，無單一答案。又或者，答案會喺好多年後先變得清晰。

繼續諗落去，人生好多嘢，都係同一個問題嘅變奏。工作最重要嘅係人工、學習嘅機會，定係爭取盡早收工呢？識朋友係為咗打發時間、得到最多著數，定係係困難嘅時候互相支持呢？人生係為咗享樂、做社會叫你做嘅嘢，定係做內心真正想做嘅嘢呢？

世事往往唔係咁簡單，每件事背後都有唔同嘅原因同考慮。不過，認清楚最重要嘅係咩，其他決定都會變得簡單咗。搵到目的地喺邊，至少知道要向咩方向行。

咁當然，咩係珍珠咩係木盒，每個人嘅答案可以好唔同。就連同一個人，唔同嘅時候都有唔同嘅答案。唔知嗰班笑人要木盒唔要珍珠嘅人，又有無諗過自己先係睇漏眼嗰個？

番左工咁多年，farewell email、散水餅，同埋最唔想見到嘅交接清單都見到慣哂。不過凡事總有第一次，第一次聽臨別贈言聽到咁感動。

公司一個高層就嚟退休，講番佢係公司做咗幾十年嘅感言，多謝佢嘅同事好有耐性咁同佢不斷辯論唔同嘅題目，務求令工作成果盡善盡美。

呢幾年有幸可以跟佢做嘢。好似佢咁講，草擬一份重要嘅文件，有幾十個草稿係等閒事。幾十版嘅文件入面每一段、每個細節都會考慮，聽好多人嘅意見，諗清諗楚先會做決定。

雖然明白呢個係認真工作嘅表現，不過喺比較枝節嘅地方改黎改去，都令人有少少攰。不過，無論其他人點攰都好，呢個高層永遠都充滿活力，唔將文件寫到滿意唔會停手。喺佢身上，我體會到咩嘢係專業。

有個舊同事講過，做會計師同律師呢啲專業服務，最「專業」個位咪就係隨傳隨到囉。雖然有啲刻薄但係都幾啱。同打官司嘅律師唔同，做商業相關嘅法律工作，好似提供法律意見、草擬下合約嗰啲，其實同喺金融機構打份工分別唔大。大家都係照顧下挑剔嘅客人，提供番啲佢地要嘅服務。尊貴嘅顧客唔鐘意而又可以執嘅，咪幫手執執佢囉。

諗深一層，有啲人心目中嘅專業形象，係光鮮嘅衣著、出眾嘅口才、聽完都唔明嘅術語，同一啲需要專業資格嘅工作。但係我認為呢幾樣嘢，同真正嘅專業都無咩關係。

行走中環，好多人都「睇落好pro」，但係工作質素未必同外表成正比。有啲律師係客人面前講到天花龍鳳，使命必達咁，但係真正要做嘢嘅時候就唔見咗人，留番俾其他同事做。

對住普通人講好多好深奧嘅術語，喺我眼中更加係一種唔專業嘅表現。我見過一個專科醫生同一班無咩讀過書嘅老人家解釋唔同嘅醫學常識，用番一啲日常生活事物黎做例子，聽到個個都明。呢個先係我想學到嘅嘢。

我心目中嘅專業，同日本嘅匠人精神有少少似。係一種對待工作嘅態度，用長時間去磨練，學好一門手藝，每一次都認真去做。真正嘅專業唔關職業事，一個作家一個廚師都可以好專業。但係另一方面，專業嘅人通常都對自己嘅成品有一定嘅執著，咁都解釋到點解有時身邊嘅人會覺得佢地有少少要求過高。

今時今日（可能一路都係），就算花好多時間去做好一件事，最後結果都可能難以令人滿意。但係一個專業嘅人通常都唔會諗咁多，唔理啲雜音，一心做好佢地手頭嘅事。

最好嘅老師，往往都係身教。同認真工作嘅人做嘢，係最好嘅學習機會。我都會盡量將學到嘅嘢傳承落去 — — 如果有人想學嘅話。

記憶中，好似從來無試過咁投入一次奧運會，睇左咁多比賽。唔知係因為之前奧運會有時差，定係無訂收費台睇唔到呢。

今次幾個電視台都有直播，可以揀自己鍾意嘅項目黎睇。我睇得最多嘅係劍擊、羽毛球、乒乓球、游水、跑步同場地單車，每個項目有唔同嘅吸引力。劍擊同場地單車之前完全唔識，睇完都覺得好精采。

睇左兩星期嘅比賽，見到香港運動員有咁好嘅表現，覺得好感動，仲有唔同嘅反思。只係有件事令我耿耿於懷，就係三十一、二歲就已經比人叫做老將，有好表現嘅仲會比人話咩「老兵打不死」。宜家三十頭好老咩？

李麗珊攞金牌嘅時候我太細個，完全無睇比賽。今次男子花劍張家朗過關斬將殺入決賽，成為全香港嘅盛事。好彩趕得切番屋企睇直播，見証到佢攞金牌嘅一刻。呢兩年香港發生左好多事，但我相信喺嗰一晚，香港人係快樂嘅。

比賽精采，之後嘅訪問更加令人難忘。聽住張家朗受訪，講最緊要係堅持嘅時候，個腦突然間浮現一句話：

An overnight success is ten years in the making.

去到奧運，相信每個選手都好努力，成敗往往係一線之差。一夜之間的全城焦點，背後係不為人道嘅辛酸。堅持呢樣嘢好似好簡單，但係實際做起黎就會有好多阻礙。可能世界嘅巔峰，往往係留俾可以堅持到最後嘅人。

得獎嘅運動員成為焦點，但係背後都有好多付出咗無數汗水嘅運動員。即使有啲運動員今次嘅成績唔突出，但係今次嘅經驗，會為將來打好基石。希望大家都會支持佢地啦。

叫我落場就一定打唔到，不過作為觀眾，睇唔同選手嘅策略都好精采。好似羽毛球女單決賽，一個主攻，一個主守，同樣精彩。放短波定長波，打到幾貼邊線，都好有學問。除左鬥體力之餘，好似鬥智嘅元素仲多。

又好似場地單車爭先賽，算係相對簡單，當中都有好多變化。兩個人踩三個圈，到底行先定行後，幾時爬頭，點樣針對對手弱項去佈局，令我覺得雙方好似係捉緊棋咁。

諗諗下做人有時都係咁。大家做嘅嘢差唔多，都可以有好多唔同嘅做法，無話邊種做法一定啱。最緊要係諗清楚，了解自己，揀適合嘅策略，無論最後結果係點，至少都唔會後悔。

有一件事我覺得好有趣。李慧詩嘅訪問強調相信團隊嘅重要性，但係同樣都係單車選手，鍊贏職業車手攞左女子公路賽金牌嘅奧地利學霸車手，分享嘅卻係：

「我建議你不一定相信你的教練。你需要相信一些人，也需要一些人在你身邊幫助你，並不能一切都靠你自己，但必須小心你信任的人。」（體路報導）

只可以話，成功嘅方法真係人人唔同喇。

雖然唔係咩運動型嘅人，不過中學年年都參加陸運會，好好彩喺個人項目同埋接力都攞過獎牌。當然兩樣都開心，但係要計嘅話，都係接力攞獎開心啲。好鐘意代表住一個團體，成隊人一條心、放心交棒比隊友嘅感覺。

好似花劍男團同乒乓球女團嘅選手都有講，為左隊友唔可以輸。同時，隊友比到信心佢地，就算自己失分都知道隊友追得番。睇住佢地一班人奮鬥個感覺真係好好。

奧運曲終人散，不過我相信佢帶比香港人嘅鼓舞唔會咁易消失。至少，希望可以學佢地咁，好好記住堅持兩個字。

不過，奧運對我最大嘅啟發，就當然係我呢個仲老過老將嘅大叔，真係要做番多啲運動喇。

今年終於有番書展。

睇新聞好似唔係太多人去，於是大安旨意星期六下晝去。結果超多人，打哂蛇餅，入到會展仲特登開個會場比你排隊，轉黎轉去，十足十以前過關番大陸咁，排左成個鐘先入到去。

入到去之後反而唔太迫，走廊闊過以前，可能係因為疫情嘅安排。啲攤擋都係好似以前咁，百花齊放之餘又硬係有啲書重重覆覆。三中商、小型出版社、特價英文書、簽名會應有盡有。

望住場入面呢個又有啲熟悉又有啲陌生嘅場面，諗起以前去嘅書展，突然間有個感覺，好多野睇落好似差唔多，但係實質上係唔同左，要番番去之前已經無可能。

講番睇書。我覺得好有進步嘅，就係好多書嘅封面設計、排版、紙質都愈黎愈好，令人好想買番去慢慢睇。但係見到成個會場有咁多攤位、咁多書，就算睇幾年都唔會睇得完一個攤位嘅書，又諗起以有涯隨無涯真係唔多掂。

屋企無位之更加重要嘅係時間寶貴。我睇小說，尤其係中文小說睇得好快，不過非小說類睇得好慢，好多時都會睇下停下，一路睇一路諗究竟本書講嘅嘢啱唔啱，同埋理論係咪站得住腳。如果揀左本唔好睇嘅，真係好浪費光陰。

結果喺書展買得好少書，真係好有興趣，又或者覺得下年應該都未必再有得買嘅先會買。其實除左書展買嘅書，屋企仲有好多都未睇，希望黎緊真係會好好睇完佢地。

但係掉番轉頭又會諗，睇左又點，過幾個月都係會唔記得，睇書學左嘅嘢好似內功咁，日積月累先會有小成。平時已經有各種雜務，睇閒書呢啲嘢可能都係順其自然就好？

有啲可惜嘅就係雖然電子書喺英文書嘅世界已經好普遍，但係好多香港出版嘅書都無電子書。Kindle 同 Kobo 睇電子書嘅體驗都唔錯（當然紙本書設計得好嘅話係最好），唔知出版社會唔會考慮下出多啲？

去完書展之後先至喺 Facebook 見到兩三本有興趣嘅新書。好彩之後網購番都好方便。

去到今時今日，要睇書已經唔使去書展，書展太多嘢睇，都唔係一個慢慢發掘好書嘅地方。不過我始終鍾意個氛圍，有好多書，身邊有好多應該都係鍾意睇書嘅人。

雖然好多嘢都同以前唔再一樣，但係呢種感覺，始終難以取代。

Medium 愈搞愈衰，係事實。

呢一兩年好多人轉場，一係去 Patreon 搵真銀，一係就 Facebook 儲人氣，或者因為種種原因唔再寫文。以前我仲會幫 Medium 講好話，解釋佢無廣告、重視文字、寫文介面簡單易用。但係呢一兩個月嘅 iOS 介面係完全用唔到。作為讀者，睇開嘅文友成日見唔到，推介嘅係我無興趣嘅英文文章，過幾個鐘開 App 又係推介同一堆文，有時甚至咩文都無。作為作者，愈黎愈少人睇文。雖然好有可能係因為自己寫嘢唔好睇，不過對住空氣講嘢始終感覺好差。

前幾日諗諗下，突然間諗起要睇 Medium 文，都唔一定要用 Medium 個 App 啫。好耐以前用過 RSS，不如試下仲用唔用到？

RSS 全名係 Really Simple Syndication，中文係簡易資訊聚合。技術嘢唔使理，簡單黎講就係可以用黎訂閱個人網站，有新文章嘅時候就會收到通知。用 RSS reader 就可以一次過睇哂訂閱咗嘅網站出嘅新文章。

RSS readers 有好多選擇，最多人用嗰個應該係 Feedly，有網頁版又有 App。登記個戶口，就可以訂閱番想睇嘅 Medium 作者。就咁入番文友 profile 嘅網址，後面加 “/feed” 就係條 RSS feed 。例如我條feed 就係 awwg.medium.com/feed。之後揀番 Follow 就得。